Dormitorio do Museo

O Museo Casa de la Troya reabre as súas portas este venres, con visitas guiadas á vella pensión de estudantes durante todo verán

Realizaranse roteiros culturais teatralizados polo centro histórico de Santiago todos os venres cun máximo de 10 participantes.

Santiago de Compostela, 15 de xullo de 2020 (Vía Láctea Comunicación).- O Museo Casa de la Troya inicia este venres, 17 de xullo, a súa temporada de verán, logo de permanecer pechada por mor da covid-19. Poderá visitarse ata, alomenos, mediados de setembro, en función de como evolucione a crise sanitaria. O horario é de 11:00 a 14:00 e de 16:00 a 20:00 horas, pechando, como é habitual, os domingos e os luns. O museo aplicará os protocolos axeitados para que as visitas se fagan con total seguridade.

Os que se acheguen ao Museo Casa de la Troya terán a oportunidade de seguir as explicacións das guías pola vella pensión de estudantes. Tal como lembra Benigno Amor, presidente da Asociación de Antiguos Tunos Compostelanos, entidade que xestiona o museo “as visitas son guiadas e teñen unha duración aproximada de entre vinte e vintecinco minutos, en grupos de dez persoas máximo”.

Roteiros troyanos

O museo inicia tamén o 17 de xullo a actividade dos Venres Troyanos, que se poñía en marcha hai tres anos con grande éxito entre público de todas as idades. Vaise desenvolver todos os venres ata mediados de setembro a partir das 19:00 horas desde a Praza de Mazarelos ata o museo, incluíndo unha visita ao mesmo. Poderán participar 10 persoas con reserva previa, chamando ao teléfono do museo (981 585 159) ou enviando un correo a visitas@lacasadelatroya.gal.

“Trátase de roteiros culturais teatralizados por diferentes rúas e prazas do casco antigo de Compostela, co fin de achegar aos participantes, de maneira amena e divertida, os feitos históricos relativos ao tempo no que transcorre a novela de Pérez Lugín La Casa de la Troya” -explica o director do museo-. Nestes percorridos o guía Suso Martínez caracterízase como o personaxe de Barcala, que representa ao estudante troiano.

Estes roteiros dramatizados pola cidade histórica, realizados coa colaboración da Deputación da Coruña, terán unha duración aproximada de unha hora e media, ata as 20:30 horas. O número máximo de participantes por cada visita será de 10 e ten un custo de 5 € por persoa e 2 € para os rapaces de 6 a 14 anos.

Roteiros Troianos
Roteiros Troyanos

Nova páxina web do museo

O Museo Casa de la Troya estrea nova páxina web –www.lacasadelatroya.gal-, cun deseño máis actualizado e con novas funcionalidades para achegar parte da historia compostelá a través do mundo online. O usuario poderá atopar información de utilidade sobre o museo e unha ampla información do edificio que o alberga, da novela, do propio Pérez Lugín, da agrupación musical do museo -Troyanos de Compostela-…e de como colaborar facéndose “Amigo do Museo” (cun custo anual de 15 €).

En canto á tecnoloxía, a nova páxina web adáptase aos estándares de Google para mellorar o seu posicionamento e achegar o museo a máis persoas a través da rede. Ofrece tamén novas posibilidades aos usuarios como a integración con Google Maps, que lles permitirá crear rutas desde calquera parte do mundo ata o museo. Trátase dunha web interactiva que engloba as principais ferramentas 2.0 (youtube, podcast…), o que a converte nunha plataforma aberta aos usuarios de todos os puntos do planeta.

Un edificio do século XVIII

O Museo Casa de la Troya recrea unha antiga pensión de estudantes e a vida universitaria de Santiago a finais do século XIX que inmortalizou Alejandro Pérez Lugín -este ano conmemórase o 150º aniversario do seu nacemento- na súa novela La Casa de la Troya no ano 1905. O edificio, construído a mediados do século XVIII, foi hospedaría de estudantes entre 1886 e 1906 e nel aloxouse o personaxe principal da novela de Lugín, Gerardo Roquer, e os seus compañeiros de estudos. Abriu as súas portas como museo en 1993, grazas ao mecenas compostelán Benigno Amor Rodríguez, finado en 2009.

Scroll to top